ທ່ານ ນາງ ບົວລອນ ວົງດາລາແສງ ກຳມະການພັກ ນວ, ເລຂາພັກເມືອງ, ເຈົ້າເມືອງຈັນທະບູລີ ນະຄອນຫຼວງວຽງຈັນ ໄດ້ເປັນກຽດເຂົ້າຮ່ວມກອງປະຊຸມສະຫຼຸບການເຄື່ອນໄຫວວຽກງານປະຈຳປີ 2016 ແລະ ທິດທາງແຜນການປີ 2017 ຂອງຫ້ອງການສະຫະພັນແມ່ຍີງເມືອງ ພິທີໃດ້ຈັດຂື້ນໃນຕົ້ນເດືອນ ມີນາ ຜ່ານມາທີ່ສະໂມສອນດັ່ງກ່າວ.

 ທ່ານ ນາງ ສຸດສະດາ ສີຫາວົງ ປະທານສະຫະພັນແມ່ຍີງເມືອງ ໄດ້ກ່າວວ່າ: ເມືອງຈັນທະບູລີປະກອບມີ 30 ບ້ານ ມີພົນລະເມືອງທັງໝົດ 69.000 ກວ່າຄົນ, ຍີງ 35.000 ກວ່າຄົນ,ເປັນສະມາຊິກສະຫະພັນແມ່ຍີງ 5.380 ຄົນ

ໄລຍະຜ່ານມາສະຫະພັນແມ່ຍີງໄດ້ຜັນຂະຫຍາຍ ແລະ ປະຕິບັດແຜນພັດທະນາແມ່ຍີງ 1 ແຜນງານ 6 ໂຄງການ ມາເປັນແຜນງານໂຄງການ ແລະ ກິດຈະກຳລະອຽດ ເປັນຕົ້ນການສ້າງເງື່ອນໄຂໃຫ້ແມ່ຍີງ ມີວຽກເຮັດງານທຳ ມີເງື່ອນໄຂໄດ້ກູ້ຢືມເງີນ ເພື່ອເຮັດການຜະລິດ ແລະ ດຳເນີນທຸລະກິດ ເປັນການສ້າງລາຍຮັບໃຫ້ແກ່ແມ່ຍີງ ແລະ ຄອບຄົວ, ປັດຈຸບັນທົວເມືອງມີສະມາຊິກກອງທຶນທັງໝົດ 4.714 ຄົນ ມີເງີນທ້ອນ 14.708.027.000 ກີບ, ທຶນສຳຮອງ 315 ລ້ານກີບ, ທຶນພັດທະນາບ້ານ 72 ລ້ານກີບ ແລະ ທຶນສະຫວັດດີການ 123 ລ້ານກີບ, ໄດ້ປ່ອຍໃຫ້ສະມາຊິກກູ້ຢືມໄປສ້າງເສດຖະກິດຄອບຄົວ, ທຳການຜະລິດປູກຝັງລ້ຽງສັດ, ສ້າງເຮືອນ, ຊື້ພາຫະນະ ແລະ ສິງຈຳເປັນອື່ນໆ ຈຳນວນ 2.078 ຄົນ, ເປັນເງີນ 13 ຕື້ກວ່າກີບ.

  ເພື່ອເປັນການສ້າງຂະບວນການສະເຫຼີມສະຫຼອງວັນແມ່ຍີງສາກົນ 8 ມີນາ ຄົບຮອບ 107 ປີ, ໃນພິທີຍັງໄດ້ມີການເລົ່າປະຫວັດມູນເຊື້ອວັນແມ່ຍີງສາກົນ, ພ້ອມທັງຍັງໄດ້ຮັບຟັງການປະກອບຄຳເຫັນຈາກບັນດາຄອບຄົວຕົວແບບ ແລະ ຄອບຄົວດີເດັ່ນ ເຊັ່ນ: ຄອບຄົວ 3 ດີ, ຕົວແບບການພັດທະນາ, ຄອບຄົວຕົວເດັ່ນຈາກການເຮັດທຸລະກິດຫັດຖະກຳໄມ້ ແລະ ຕົວແບບທາງດ້ານແກະສະຫລັກໄມ້.

ຂໍ້ມູນຈາກ: ວາລະສານ ອົງການປົກຄອງນະຄອນຫຼວງວຽງຈັນ